Pak se na veliko raspravla kak da si privremeno zememo onu vojarnu vu Optujskoj vulici. Premišla se kaj bi mogli vu nju smestiti, a kaj mi je najčudšneše, prečital sam kak moremo biti ponosni kajti smo mi postali jedini grad koji je vse bivše vojne komplekse uspel dobiti na koriščenje ili čak vu svoje vlasništvo... Najme, kaj?

Več smo prije par let “dobili” od države onu vojarnu vu Križaničevoj vulici. V tim negdašnjim objektima gdi su bili vojniki sad su smeštene društvene organizacije, tehnička kultura i Veleučilišče, a tam gdi je bil egzicir plac sad je zraslo čist novo moderno gradsko naselje (POS-stanovi).

I vojarnu pri kolodvoru pretvorili smo vu Študentski dom, koji sad zgledi kak jeden pristojni hotel. Jedino se još raspravla kaj bi vse i ko bi vse trebal dojti tam vu objekte vojne pekarne vu Ludbreškoj vulici, jer kandidatov za dotične prostore je puno, pogotovo med mladima.
Daklem, gda se vse skup zeme, Varaždin nie bil samo grad baroka, glazbe i cvetja nego i - grad vojnikov! A vse spomenute četiri vojarne nisu jedine koje su bile v našem gradu, ali nekoje več odzdavna služiju za čist nekaj drugo. Na primer, negdi z kraja 19. stoletja Varaždin je imal okolo 11 tisuč stanovnikov, a od njih je okolo deset posto bilo vojnikov i oficirov. I za Austro-Ugarske imali smo vojarne, koje su mam posle Prvoga svetskoga rata postale - kasarne, za vrieme Drugog svetskog rata bile su domobranske vojarne, da bi onda pak postale kasarne, a zadnjih dvajsti let znovič su – vojarne, vse dok nisu zgubile tu funkciju.

I sad se vi pitate: Zakaj se Klopotec tuliko raspisal o tomu? Zato, kaj nam tumačiju kak nam sad za naše civilne potrebe država velikodušno daruje kasarne, točneše vojarne i plac na kojemu su negda bile zazidane. A ako čovek otpre nekoje stare knjige o Varaždinu, videl bu da nam pravzaprav poklanjaju nekaj kaj je več bilo – naše, varaždinsko!

Zel sam si ja v ruke “Poviest grada Varaždina” od gospona profesora Rudolfa Horvata, v kojoj puno piše o tomu kaj se je vu Gradu značajnoga događalo. I našel sam da je Gradsko zastupstvo 1892. leta doneslo zaklučka da se vu Optujskoj vulici, tam pri kapelici svetoga Fabijana i Sebastijana zdigne “normalna domobranska vojarna” na trošek od 46.250 forinti i 94 novčičov, a polek nje i “natkrita jašiona” za stajaču vojsku za koju bu Grad našel još 47.892 forintov i 15 novčičov! Daklem, Grad je dal peneze i plac, zgrade još sad tam stojiju, jedino su mesto jašione vu zadnjih pol stoletja bile garaže za tenke da ne zmokneju...
Da ne iščem dalje cifre i podatke, naš Grad je na isti način počel graditi i vojarnu vu Križaničevoj vulici, kaj je onda bilo čist na kraju grada, gdi su rasli kuruza i krumpir. Zato se onda, kak se to danas veli, poljoprivredno zemlište pretvorilo vu građevinsko, kak i danas negdi na periferiji delamo, samo vu privat režiji.

Zgodni je i popis gradskoga vlasništva iz 1892. leta. Kasarna vu Optujskoj vulici vredila je okoli 90 tisuč forinti, kazališče 130, gimnazija 80, večnica 20, a bolnica 14 tisuč forinti. I vse to se liepo more najti vu starim knigama, za razliku kak je denes. Gdi bi mogli najti još jednoga profesora Horvata ili kakšnu inštituciju koja bi napisala poviest Varaždina posle 1914. prama našim letima?