Čitam v novinama kak se naš gradonačelnik jako rasrdil na Stručnomu kolegiju, jerbo i se nadale po gradskoj jezgri vozikaju z autekima ko se kak zmisli i komu kak opadne na pamet. Najme, gradskom odlukom to je zabranjeno, pak samo auti koji voziju robu vu dučane moreju dojti do jezgre i to samo od 7 do 9 vur v jutro.

Buduči da se gradonačelnik poradi toga srdi več ne znam koji put, morem i ja opet o tomu pisati, makar sam još pred par let imal tu temu vu svojemu vuglecu. Najme, i mene je nekaj sličnoga jako rasrdilo nekoji dan, dok još nie bila postavlena vu Kranjčevičevoj vulici, tam pri Robnoj hiži Varteksa, baraka gdi se sako leto vu ovo vrieme prodavaleju friški krafni. Kaj me to rasrdilo?

I Franjevački trg je pešačka zona gdi čovek more iti i vzduž i poprečki, pak sam i ja tak išel po sredini placa vu strahu da mi se sneg ne strese z krova na glavu. Ali, onda je z Kranjčevičeve vulice, kak z topa, zletel veliki črleni auto, vu njemu je nekakšni kratko ošišani klipan z jednom rukom drži volana a z drugom mobitela i nekaj žlabral i još k tomu gledal nekam v zrak?! Čist malo je falilo da me nie potegnul z štosdemferom, i odjuril kak da ništ nije bilo...

Sad se ja pitam: Kuliko zaistinu treba vremena da se odluka o prometu vu gradskjoj jezgri počne poštivati? I to bez puno filozofiranja o tomu, je li bumo vulice ogradili na ov ili on način. Jerbo, komunalci su na onom sastanku tumačili kak baš iščeju projektna rešenja, a to mora reči struka i več se vodiju – oštre rasprave... Navodno, jedni predlažeju elektroničke stupeke koji bi se automatski spuščali v sedmi vuri i zdizali vu devetoj; drugi misliju da bi trebalo postaviti drvene žardinjere (onakšne betonske kakšne več negdi stojiju, ali na trotoaru); tretji veliju da se postave fiks železni stupeki i ostave samo dva ulaza.

Po mojemu, tri su vrste onih kaj se po gradskoj jezgri voziju z autima: oni kaj tam stanujeju, oni kaj kakti robu dovažaju i oni kaj z čistoga hohštapleraja voziju poprečki. Razmem da vlasniki bar jemput na dan moraju z autom ziti z svojega dvorišča i vrnuti se nazaj, no ne razmem dostavlače koji okolo podneva dojdeju z kamiončekom na Korzo da bi vu dučan predali kakšnoga maloga paketa. I to su obično oni z ZG-registracijom, pak misliju zato kaj su došli z metropole da moreju vu provinciji delati kaj hočeju. Nek probaju vu Zagrebu na Banusplacu parkirati se ako vupaju! I tretji su oni koji misliju da se do krčme na Stančićevom placu ili Gajevi vulici baš moraju z autom dopelati. Ili morti direkt do svojega radnoga mesta...
Ja nisam od komunalne struke nit imam stručne projekte kak to rešiti. Ali znam nekaj puno faleše. Nemam pri sebi gradsku odluku pak ne znam kaj piše vu kaznenim, prelaznim i završnim odredbama, ali sam siguren da tam pišeju nekašne cifre. Komunalni redari z značkama i blokom v ruki mogli bi za čas posla rešiti takšne probleme, makar privremeno i bez kojekakšnih stupekov. Ko bi došel v gradsku jezgru a ne sme - trebal bi platiti kaznu, rečemo barem kuliko košta jedno tankiranje, pak si bi malo premislil drugi put. “Požepnina” je najefikasneša mera, kuliko se meni vidi. Fletno deluje, a dugo se pamti!