Gda sam prošloga tjedna prijepoldan krenul na svoj uobičajeni špancir prama Korzu, još vu Trakoščanskoj vulici videl sam na skoro sim autima na šoferšajbama pod brisačima nekakšni letek na kojem je pisalo “Ne damo Varteks!” Kak se ovih danov piše po novinama i slika na televiziji o našoj poznatoj fabriki “Varteks”, za koju govoriju da bu vsakoga dana vse menjša dok na nekakšnoj novoj lokaciji ne dostigne brojku malo vekšega šnajderaja, pomislil sam si kojekaj...

Nisu se valda radniki pobunili kak onda 1936. gda su “tivarovci” napravili najvekši štrajk vu onoj državi, koji je trajal mesec dana, i na kraju dobili kaj su iskali!? Moram priznati, malo sam se i splašil... jerbo, drugo je vrieme, nije sad štrajkati samo tak. Najme, 1936. je vu fabriki delalo pol Varaždincov a pol z okolnih sel (Kučana, Trnovca, Kneginca i tak dale), pak su oni seljaki i radniki liepo solidarno hranili svoje varaždinske prijatele.

Ipak, zeznal sam v gradu da ta parola ne ide na račun ove, negda najvekše tekstilne fabrike vu ovomu delu Europe, nego na njenoga imenjaka - Nogometni klub “Varteks”! Nije se v gradu puno niti znalo da nogometaši “Varteksa” nisu dobili plače par mesecov jerbo je kasa prazna, a gubitki poprilični. Mi smo samo gledali na rezultate tekmi, srdili se gda bi dečki po bedastoči zgubili a mogli su dobiti, i na kraju smo vu prosincu bili srečni da smo na jedanajstomu mestu, kajti je mogla prva liga imati i samo deset momčadi!

Daklem, “Ne damo Varteksa!” pisali su i polepili na aute Vajtstonsi, oni najverneši navijači našega kluba, i usput rečeno najfineši vu prvoj ligi, jerbo smo čuli da bi se moglo “Sveto ime Varteks” premeniti ime vu – ko zna kaj. Najme, fabrika “Varteks” nije lani dala niti prebite lipe za nogomet, jerbo im gazde i menadžeri tak gospodariju da nie dosta niti za poštene plače radnikima, a kam da još i plačaju reklamu, kak je drugdi inače red i običaj.

Zato sad vu Gradu razmišlaju da bi trebalo raspisati natječaja za nekakšno novo ime nogometnomu klubu, pronajti mu novoga sponzora koji bi skup z drugima, pa i gradskim penezima, financiral naš nogometni pogon. Ne računaju da je ime “Varteks”, gda je reč o nogometu, sakomu domačem kibicu več od polovine prošloga stoletja (točneše od 1958. leta) pri srcu: od nas koji smo tam na breščecu z istočne strane igrališča navijali dok smo bili vu kratkim hlačama, pak do denešnje najmlajše generacije v kojoj su si oni najglasneši dali ime “Vajtstonsi”. Oni misliju, a ja se z njima slažem, da bi ime “Varteks” trebalo ostati, taman da fabrika istoga imena odide tam prama Knegincu, pak si zeme pokrovitelstvo nad njihovom “Dubravkom”, jerbo bi spadali vu – istu ligu.

A morti gradski poglavari računaju da nam i ne treba varaždinskih nogometašov v prvoj ligi. Istina je, Varaždin ima samo 50.000 stanovnikov. Ali kuliko imaju na priliku Šibenik, Koprivnica, Zaprešič, Čakovec ili – Sesvete? Nečem reči da našemu gradu ni trebala nova športska dvorana pri Dravi. No, samo v srpnju i kolovozu gda je bila čist prazna – kak sam čul - z gradske kase je odišlo za dvoranu skoro dva i pol milijona kuna. A lani smo proslavili ravno sto let nogometa vu Varaždinu. Daklem, nekaj bu treba zmisliti kak bi se i Nogometnomu klubu “Varteks” zadržalo ime...