Još od negda rad sam čital vse kaj mi dojde pod ruku, knige z knižnice i razne novine, a sad mi je dobra zabava čitati materijale kaj ih gradski večniki dobivleju vu velikim paketima za svoje sednice. Istina, ja to obično čitam zabadav ili za drobne peneze, a oni za hiljadarku na mesec, ali ne bi sad vu to pehal...

Nego, evo iz zadnjega paketa za članove Gradskog vieča posebno mi se zdopal on priedlog “Sporazuma o zajedničkim interesima Grada Varaždina i Varteks”. Zakaj? Vu njemu se Grad Varaždin i Varteks dogovarjaju za suradnju vu području imovinsko-pravnih odnosa, očuvanju radnih mesta i drugih zajedničkih interesa, koji su i mene fest zainteresirali.

A da bi i večnikima bilo jasno o čemu se dela, još su dobili “Pismo namere”, koje je potpisal generalni direktor Varteksa, makar  mislim da ga je pisal netko drugi, kajti je on ipak Varaždinec i zna nekaj o njegovoj poviesti. Piše kak je Varteks dal veliki doprinos za opči gospodarski i socijalni napredak građana Varaždina i da je zapošlaval najviše radnikov i bil najvekši izvoznik. To bi kakti moglo značiti - da nie bilo Varteksa ne bi bilo niti Varaždina, pak onda ne bi mogli niti slaviti osamstoletnicu!?

Dale čist ozbilno piše da je Varteks Varaždinu ustupil parkirališče za Gradske bazene, kaj ipak ne bu išlo. Najme, kuliko pamtim, vse tam od bivše krčme Hruza do negdašnjega Društvenoga doma rasli su ili kuruza ili krumper, kojega su vlasniki bili največ seljaki z Kučana, a od kojih su nekoji morti i bili radniki Tivara. Faliju se, takaj, kak su Gradu “prepustili sve športske objekte i zemljište”, kaj vredi okolo 100 milijon eurov. Dajte, najte! Ja se zmislim kak je zgledalo Tivarovo i Tekstilcovo igralište z starim drvenimi tribinama, a sigurno ona negdašanja država za Univerzijadu nie peneze dala Varteksu da napravi takšnoga lepog stadiona nego Gradu Varaždinu. Se slažete?

I još piše da su “Varaždinu kroz svoju poviest najviše pomogli u sufinanciranju svih velikih sportskih klubova i udruga...” Kuliko se ja v nogomet razmem, nogometaši su navek nosili na majicama ime “Varteks” a ne «Varaždin», pak se onda pitam - ko je komu delal reklamu? A to isto vriedi i za hrvače, na priliku, da nejedem idem dale...

Sad bi zbogradi vsih takšnih velikih “zasluga” trebalo potpisati sporazuma, vu kojemu je najvažneše to da bi Grad trebal osigurati 40 tisuč kvadratov terena i pokloniti ga Varteksu tam negdi v Brezju ili negdi drugdi. A onda bi još Grad moral pomoči da država da svojega doprinosa od sto tisuč kvadratov placa gdi bi trebal zrasti novi Varteks ili kak se bu več zval, ako vgasne fabrika štofa.

Još sam našel vu tom sporazumu kak bi Varteks svojega jednoga duga Gradu prebil z placom vu Biškupcu (tam gdi je Autosejem), a gdi “prema procjeni stručnjaka” 17 tisuč kvadratov vredi nekaj više od 12 milijonov kuna. Gda sam to prečital, zmislil sam se da v jedni knigi piše kak se 2010. leta navršavle ravno 110 let od gda je Gradsko poglavarstvo za početak gradnje tekstilne fabrike (one prve pamučne, ali na istomu mestu), poklonilo deset rali zemle ili 37 tisuč kvadratov, i još k tomu 1.300 forinti. A sad bi isti svoj plac - moralo znovič otkupiti?!
Na kraju toga budučega sporazuma još liepo piše da buju se na sadašnjoj lokaciji Varteksa novi “sadržaji utvrđivali prema zajedničkim interesima i Grada i Varteksa”. Pa kaj god to značilo!