Baš mi se zdopalo kaj se naša Varaždinska televizija z početka ovoga meseca v proslavu Dana grada vključila najbol kaj se je mogla, najme, pokazala je čak pet starih filmov o Varaždinu, za koje puno Varaždincov niti ne znaju da uopče postojiju. Tak mi se je znova zdopal i on film koji je bil snimljen za prvu osamstoletnicu Grada (1981.) i kojega sam još onda triput gledal v kinu “Park”. Film traje punu vuru i pol, režiral ga je Peter Veček, a prelepe snimke napravil je

Ilija Lekič, vu ono vrieme jen od najbolših snimateljov na zagrebačkoj televiziji.
A jerbo je film sniman prije one obletnice, liepo se v njemu vidlo kak je Varaždin zgledal prije toga. Tak si mam moremo zamisliti kaj se je vse napravilo vu gradskoj jezgri da bi ju čim bol zbegecali za proslavu tih 800 let kak se je Varaždin spominjal vu poviesti. Znucane fasade na Korzu, i fraterske i pavlinske cirkve, a posebno turnji bili su 1981. zguleni skoro do ciglov, a Stari grad je zgledal kak  da se hoče podreti ili ga mam treba prepustiti arheologima. No, vidi se vu tom filmu i kak se počel delati novi del grada, kak več štrči vodotoranj, kak je liepa bila Đurekova vulica tam gdi je prije pet rasla kuruza, ali su rečemo Zagrebačka ili Vrazova vulica zgledale kak i pred sto let.

A jedne su večeri pokazali vrednoga črno-beloga filma kaj se zval “Varaždin – grad tradicije i slave” i koji je, ne bute veruvali, bil zgotovlen 1935. leta. On svedoči kak je naš grad ili točneše njegov centrum zgledal vu to vrieme gda je zeleni plac bil pri Grguru Ninskomu a stara se krama prodavala v Cankarevi vulici kak sad na Sajmištu. Vu starim novinama “Varaždinskim novostima” našel sam članka iz 1934. leta “Filmovanje grada Varaždina”, a v njemu piše kak je iz Zagreba došla “ekspedicija Higijenskoga zavoda pod vodstvom dr. Chloupeka” koja je filmala naše crkve, fasade, gradsku večnicu, kazališče, a posle su snimali i najzanimleveše kraje Zagorja, Trakoščan, Ravnu Goru i Veternicu... I del toga 75 let staroga filma mogli smo sad gledati na našoj Varaždinskoj televiziji.

A zakaj pravzaprav o tomu tuliko pišem? Zato kaj sam i ja tam negdi pred četrdeset let opčinskim komunalnim ocima predlagal nek kupiju dobroga fotoaparata i onu kinokameru “šesnajsticu” (jerbo digitalcov onda još nie bilo), i nek zadužiju jednoga ili dva činovnika da poslikaju i pofilmuju vse kaj se v gradu događa prije nego se počne nekaj staroga rušiti i novoga graditi. Znate kaj su mi rekli? Da govorim bedastoče! I sad zato, nemamo pojma kak je zgledala Milička vulica ili Vulica brače Radič, a samo se stari Varaždinci zmisliju raskrižja Pavlinske i Šenoine od prije nego kaj je zrasel denešnji “barokni” Coning centar...

I vu Optujskoj vulici bile su samo stambene prizemnice a sad je dučan do dučana, pozabili bumo i kak je zgledala Preradovičeva prije nego je dobila “gimnazijskoga aneksa”, kak i da su vse okolo grada kuruza i krumper rasli tam gdi su sad trgovački centri. Na žalost, o tomu nema nikakšnoga, službenoga, filmskog zapisa. A malo bolša videokamera denes košta kak jeden malo pošteneši domjenek. Samo bi trebalo i o poviesti tu i tam misliti...